Elecciones legislativas del 9 de agosto: otro terremoto que golpea a Haití

Pati Kan Pep la

(Traducción al castellano en breve)

Rasanbleman Sosyalis pou yon Inisyativ Nasyonal tou Nèf Pati RASIN Kan Pèp La

Pòtoprens jedi 13 dawout 2015

Eleksyon Senatè ak Depite 9 dout 2015 lan, se yon lòt goudougoudou ki frape Ayiti.

Blòk ki sou pouvwa fè gany, peyi a anjeneral, mas popilè yo an patikilye pèdi.

Pati RASIN Kan Pèp La denonse enperyalis yo ak aparèy yo tankou MINISTA, Kò gwoup la, OEA, Inyon Ewopeyèn ak kolabo yo ki gen tan bat bravo pou maskarad eleksyon gouvènman Mateli Pòl la. Nou konnen se yon fason pou yo pase dirijan restavèk yo lòd pou asepte eleksyon magouy, eleksyon fo mamit yo reyalize dimanch 9 dawout la. Yon lòt fwa ankò, pwisans enperyalis yo travay pou benyen Pèp ayisyen an nan labou ak lawont pandan y ap kontinye kraze, demantibile tout enstitisyon nan peyi a pou konsakre definitivman sitiyasyon okipasyon ak estrikti neyokolonyal yo. Li klè maskarad 9 dawout la plonje peyi a pi fon nan kriz kote klas politik la ak enstitisyon yo pa gen lejitimite epi pèdi tout respektabilite.

Kote tout lajan an pase?

Kijan nou ka esplike tout pwoblèm enfrastrikti ki prezante yo lè nou konnen gen 36 milyon dola vèt ki fè fon nan briganday sa a. Tout moun konstate move jesyon PNUD fè ak bidjè eleksyon an lè li depanse 10 milyon dola vèt pou enprime bilten jis Dubaï epi achte yon seri materyèl elektoral jis nan peyi Afrik di Sid. Se tout popilasyon an l ap pase nan betiz ak moso fom yo rele izolwa yo ki fòse moun vote ajenou ak yon move lank ki pa pran 30 minit pou li sòti sou dwèt ou. Abraham di sètase. Fòk yo sispann pase Pèp ayisyen an nan won tenten pandan kèk antrepriz ak kèk mafya ap dekoupe kòpyèz sou do li. Kiyès ki pral mande revokasyon fonksyonè PNUD yo ki t ap jere kesyon sa yo ak konplisite reskonsab KEP la?

Nou tann twòp atò, bon eleksyon paka fèt anba okipasyon, li pa ka fèt ak yon aparèy elektoral kolonize.

Pati Rasin Kan Pèp La denonse oligachi Ayisyèn lan k ap eseye fè dap piyanp sou pwosesis elektoral la. Se konsa nou jwenn 2 prensipal Pati pouvwa a (Boukliye avèk Pati Ayisyen Tèt Kale PHTK) ki reprezante yon branch nan oligachi a, ki te gen gwo mwayen nan men yo pou mennen kanpay. Nan ka PHTK menm, Prezidan Mateli sèvi aklè ak materyèl ak lajan Leta pou fè kanpay pou li. Kote dekrè elektoral la KEP la di l ap aplike? Anplis li klè pou tout moun, se PHTK ak Boukliye ki responsab pifò vyolans ak kraze brize nan eleksyon yo. Pa ekzanp Nan sant vòt Madan Pajo, ak Òlòf Palme Ti Rivyè Latibonit mèsenè Boukliye, PHTK ak lòt alye vin tire anndan biwo vòt yo an prezans polisye yo ak ajan sekirite elektoral yo. Sanble gen yon sektè ki te gen kòm konsiy kraze eleksyon yo lè nou wè gen sant vòt ki gen tan kraze depi 7è nan maten[1].

Sou kesyon manda : Pati Rasin Kan Pèp la ap denonse KEP la ki te deside bay PHTK, Boukliye ak kèk lòt pati ki pwòch pouvwa a manda, alòske majorite Pati Politik yo pa t jwenn manda jis nan dimach maten jou eleksyon an. Sa k pi grav la, lè yo resi jwenn manda a, manm BEK yo refize mandatè yo antre nan sant vòt yo. Tankou sa rive kandida Platfòm Leve Kanpe nan Ti Rivyè, nan Gwo Mòn ak nan vil Ench. Se mandatè PHTK ak Boukliye ki okipe tout sant vòt yo.

Sou dwa vòt elektè yo : Nou gen prèv (nan plizyè komin) yon seri moun ki abite epi abitye vote nan yon sikonskripsyon, KEP la voye yo nan lòt sikonskrisyon. Moun sa yo dekouraje, yo tou retounen lakay yo san yo pa vote.

Nan chak sant nou pase, se kèk grenn moun nou jwenn k ap vote. Popilasyon an chita lakay li, yon lòt fwa ankò, li boude eleksyon senatè ak depite yo. Popilasyon ayisyen an sonje maskarad 2010 – 2011 la kote se OEA ki chwazi ki moun ki genyen eleksyon prezidansyèl yo. Popilasyon an ap konstate yon lòt fwa ankò eleksyon se yon espas bandi achte lajan kontan pandan y ap avili peyi Desalin lan. Sa mete nou nan yon sitiyasyon kote maskarad eleksyon sa a pral bay yon seri senatè ak depite ilejitim nan kad pwolonjman ak apwofondisman kriz enstitisyonèl la.

Nou konstate nan sant vòt yo, gen moun ki mache vote nan plizyè biwo vòt. Kòm sant vòt yo te chaje avèk mandatè PHTK ak Boukliye, yo fè gwo presyon sou elektè yo pou vote pou kandida pa yo. Gen kote yo bat moun ki pa vle vote pou yo. Gen sant vòt manm PHTK ak Boukliye yo, boure bwat bilten yo.

Kraze sant vòt yo : Bandi legal PHTK, Boukliye ak lòt Pati alye yo, zam alamen, manchèt, baton ak wòch, kraze tout sant vòt yo sispèk yo pa gen okenn chans fè magouy. Nan Lenbe yo mete dife nan lameri. Nan depatman Lwès la, se byen bonè nan maten moun ak zam kraze sant vòt yo. Pifò kote zak kraze brize sa yo fèt, popilasyon an lonje dwèt sou manm PHTK ak Boukliye. Anpil kote, zak sa yo pase anba je fòs okipasyon MINISTA a ak polis nasyonal la. N ap raple, depi nan kanpay elektoral la, moun te deja ap denonse vyolans PHTK ak Boukliye ap fè, men KEP la pa t pran okenn desizyon kont yo. N ap raple, USAID te finanse yon gwoup ki t ap fè dezòd pou Michèl Mateli vin Prezidan ak plizyè santèn milye dola vèt nan peryòd eleksyon 2010 – 2011 yo[2].

Pati RASIN Kan Pèp La mande pou tout moun pran nòt. Chak fwa gen eleksyon, popilasyon Ayisyèn lan montre li gen volonte pou l patisipe yon fason demokratik, men se toujou gouvènman, patizan gouvènman an, enperyalis yo ak reprezantan yo ki kraze eleksyon yo. Nou panse tout fòs demokratik yo dwe kanpe ak Pèp la sou teren eleksyon yo tou.

Yon fwa ankò, eleksyon dimanch 9 dawout la, se yon lòt katastwòf, yon lòt goudougoudou, ki te anonse l ap vini, yo lage sou kotòf lestomak Pèp ayisyen an.

Devan sitiyasyon lawont ak desepsyon eleksyon 9 dawout la lage popilasyon an, nou menm nan Pati RASIN Kan Pèp La nou afime kalite eleksyon sa yo pa ka mete nou sou wout rezolisyon kriz sosyete a. Popilasyon an dwe pran reskonsabilite li pou mache sou chimen yon revolisyon ki kapab kraze tout sistèm dominasyon an. Lè sa pèp ayisyen an ap reyisi mete okipan yo deyò, retire mayèt pouvwa a nan men konze ak kolabo yo epi ap rive kraze dominasyon klas ki pran chimen destriksyon nasyon an.

Viktwa a, se pou pèp òganize. An n òganize nou pou mete peyi a sou ray revandikasyon mas popilè yo ak tout sektè patriyotik, demokratik, popilè yo.

N ap mande pou:

– KEP a aplike dekrè elektoral la lè li elimine Boukliye ak PHTK nan eleksyon an. Pawòl           Prezidan Mateli nan Miragwan jou 28 jiyè a te deja mete PHTK deyò sou baz tout ekzèsis demokratik.

– KEP a elimine PHTK pou itilizasyon ilegal resous Leta nan kanpay la;

– KEP a elimine PHTK ak BOUKLIYE pou tout vagabondaj ak krim yo komèt nan jounen 9 dawout a;

– KEP a tabli yon komisyon endepandan pou evalye jounen 9 dawout la e idantifye tout reskonsab krim ki komèt nan jounen 9 dawout la pou yo ka resevwa sanksyon yo merite dapre lalwa. KEP la dwe retire tout delenkan sa yo nan kous elektoral la.

  • KEP la dwe fè arete epi trennen devan lajistis tout moun ak dirijan Pati Politik (lotè entèlektyèl) ki enplike nan zak vyolans kont popilasyon an ak kont eleksyon yo;
  • KEP la dwe pare pou anile maskarad eleksyon dimanch 9 dawout 2015 lan sou baz rezilta travay evaliasyon komisyon an.

Pati RASIN Kan Pèp La, mande:

  • Pou Leta repanse estrateji finansyè ak oganizasyonèl pou reyalize eleksyon yon lòt jan nan peyi a
  • Pou tout fòs patriyotik yo rasanble pou mete kanpe yon pwojè nasyonal altènatif ki pou leve eskanp figi peyi a e ki ka anpeche repetisyon katastwòf 9 out la.
  • Viv yon Pèp Lib nan yon peyi granmoun!
  • Viv Ayiti!
  • Nou bezwen eleksyon dekolonize, eleksyon ki pa anba pat bandi ak machann dwòg, eleksyon ki pa anba pat sektè ki gen anpil lajan.

N ap raple jounalis yo ak piblik la an jeneral Pati RASIN Kan Pèp ak ESKANP fòme Platfòm politik Leve Kanpe ki patisipe nan eleksyon 9 dawout yo.

Pati a salye kouraj ak detèminasyon kandida depite ak senatè Platfòm Politik Leve Kanpe yo ki fè anpil sakrifis pou mennen batay la nan chak sikonskripsyon kote yo ye a. Nou salye sa ki pote laviktwa e sa ki sou wout pote lamayòl. Nou sèten angajman yo pou peyi nou an ap fè yo mete soukote enterè pèsonèl yo pou kontinye konba pou eleksyon fèt yon lòt jan nan peyi a.

[1] Tout done nou itilize nan kominike sa a sòti nan divès rapò obsèvasyon elektoral ki pibliye yo e nan rapò kandida Platfòm politik Leve Kanpe nan divès komin.

[2] Nou ka jwenn enfòmasyon sa yo detaye nan atik Jake Johnston pibliye sou sit entènèt Center for Economic and Policy Research nan dat 7 out 2015 ki rele: ” Contract Document Shows USAID Aware of Partner’s Political Ties”. Konsilte: http://www.cepr.net/blogs/haiti-relief-and-reconstruction-watch/contract-document-shows-usaid-aware-of-partner-s-political-ties

Un comentario en “Elecciones legislativas del 9 de agosto: otro terremoto que golpea a Haití

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión /  Cambiar )

Google photo

Estás comentando usando tu cuenta de Google. Cerrar sesión /  Cambiar )

Imagen de Twitter

Estás comentando usando tu cuenta de Twitter. Cerrar sesión /  Cambiar )

Foto de Facebook

Estás comentando usando tu cuenta de Facebook. Cerrar sesión /  Cambiar )

Conectando a %s